𝐈𝐋𝐋𝐄𝐆𝐀𝐋 𝐑𝐄𝐂𝐑𝐔𝐈𝐓𝐄𝐑𝐒, 𝐓𝐈𝐌𝐁𝐎𝐆 𝐒𝐀 𝐁𝐀𝐒𝐈𝐋𝐀𝐍

Ni Ven Marck Botin

ARESTADO ng mga tauhan ng Philippine Coast Guard (PCG) at Philippine National Police (PNP) ang dalawang (2) hinihinalang illegal recruiters sa barangay Binuangan, Isabela City, Basilan, kahapon, ika-29 ng Mayo 2023.

Ayon sa isinagawang entrapment operation ng dalawang ahensya, “naaktuhan ng mga otoridad ang personal na pagtanggap ng mga suspek sa ‘marked money’ na nagkakahalaga ng ₱91,000 mula sa mga nagpanggap [na] aplikante ng PCG”.

Nakuha sa pagmamay-ari ng mga suspek ang “patung-patong na PCG application folders, [cellular phone, at sling bag na naglalaman] ng “marked money”.

Kinilala ang mga suspek na sina Yazier Tanji Balling at Rodel Alegre Lagayan, mga wastong gulang, mga residente ng Bgy. Kaumpurnah Zone 1 at Lapiedad sa nabanggit na bayan, lalawigan ng Basilan.

Nahaharap naman sa kasong paglabag sa Article 315 ng Revised Penal Code o Estafa ang dalawang suspek.

Dagdag dito, nananawagan naman ang Philippine Coast Guard sa mga aplikante na agarang ipagbigay-alam sa kanilang ahensya ang ganitong uri ng mga gawain nang mabigyan ng agarang aksiyon.