𝗞𝗔𝗠𝗣𝗢 𝗡𝗜 𝗗𝗔𝗡𝗔𝗢, 𝗨𝗠𝗔𝗣𝗘𝗟𝗔 𝗦𝗔 𝗢𝗠𝗕𝗨𝗗𝗦𝗠𝗔𝗡

Nina Ven Marck Botin at Vivian R. Bautista

𝘜𝘔𝘈𝘗𝘌𝘓𝘈 𝘴𝘢 𝘖𝘧𝘧𝘪𝘤𝘦 𝘰𝘧 𝘵𝘩𝘦 𝘖𝘮𝘣𝘶𝘥𝘴𝘮𝘢𝘯 𝘢𝘯𝘨 𝘬𝘢𝘮𝘱𝘰 𝘯𝘪 𝘔𝘢𝘺𝘰𝘳 𝘎𝘦𝘳𝘢𝘯𝘥𝘺 𝘋𝘢𝘯𝘢𝘰 𝘩𝘪𝘯𝘨𝘨𝘪𝘭 𝘴𝘢 𝘴𝘶𝘴𝘱𝘦𝘯𝘴𝘺𝘰𝘯 𝘯𝘢 𝘪𝘱𝘪𝘯𝘢𝘵𝘢𝘸 𝘭𝘢𝘣𝘢𝘯 𝘴𝘢 𝘯𝘢𝘣𝘢𝘯𝘨𝘨𝘪𝘵 𝘯𝘢 𝘢𝘭𝘬𝘢𝘭𝘥𝘦, 𝘢𝘺𝘰𝘯 𝘴𝘢 𝘵𝘢𝘨𝘢𝘱𝘢𝘨𝘴𝘢𝘭𝘪𝘵𝘢 𝘯𝘪𝘵𝘰.

Sa panayam ng

Repetek News

kay Jojo Gastanes, aniya, pinatawan ng anim na buwang suspensyon ang kasalukuyang mayor ng bayan ng Narra dahil umano sa paglabag nito sa Anti-Red Tape Law (ARTA) sa ilalim ng Batas Republika 11032 partikular na sa seksiyon 21 o “Violations and Persons Liable. – Any person who performs or cause the performance of the following acts shall be liable…”.

Kuwento ni Gastanes, pinawalang-sala ng Ombudsman si Danao sa kasong paglabag sa grave misconduct at anti-graft. Subalit may suspension order na dumating sa alkalde nitong nakaraang Biyernes dahil umano sa paglabag ng punong-bayan sa ARTA sa kadahilanang hindi niya pagdagdag ng mga requirements sa pag-impose ng Mayor’s permit laban sa nasabing complainant.

Sa kasalukuyan, nasa kamaynilaan ang kampo ni Danao upang mag-apela sa Ombudsman hinggil sa kautusan ng ahensya kamakailan.

“…may suspension order na inilabas, natanggap namin [nitong araw ng] Biyernes. That’s why, nasa Manila kami ngayon para [mag-file ng Motion for Reconsideration] sa desisyon ng Ombudsman,” saad ni Gastanes.

Aniya, hindi na rin nagkaroon ng interes ang Citinickel Mines and Development Corporation (CMDC) sa naturang kaso.

Binigyang-diin ni Gastanes na binawi na ng complainant ang isinampang kaso kay Danao bago dumating ang nasabing suspension order.

“…ang desisyon na ‘yan [ay] hindi na rin nagka-interes ang Citinickel. Actually, ang nag-file niyan ay [Citinickel Mines and Development Corporation] pero [binawi] na rin nila ‘yung kanilang [isinampang] criminal administrative liability [charges laban] kay Mayor Danao. [Although, may desisyon na bago sila nag-motion but nauna pa rin doon sa [ini-release na suspension order ng Ombudsman]. No’ng ini-release ‘yan kapa-file lang ng motion… Dapat hindi na rin tinuloy kasi may motion na rin, pero in spite with the fact, ay nag-serve pa rin ang Ombudsman,” dagdag pa niya.