𝗣𝗔𝗟𝗔𝗪𝗘Ñ𝗢, 𝗡𝗔𝗠𝗔𝗠𝗔𝗬𝗔𝗚𝗣𝗔𝗚 𝗦𝗔 𝗦𝗔𝗟𝗢𝗡 𝗜𝗡𝗗𝗨𝗦𝗧𝗥𝗬 𝗦𝗔 𝗞𝗔𝗠𝗔𝗬𝗡𝗜𝗟𝗔𝗔𝗡

Ni Ven Marck Botin

𝘕𝘈𝘔𝘈𝘔𝘈𝘠𝘈𝘎𝘗𝘈𝘎 𝘴𝘢 𝘬𝘢𝘮𝘢𝘺𝘯𝘪𝘭𝘢𝘢𝘯 𝘢𝘯𝘨 𝘗𝘢𝘭𝘢𝘸𝘦ñ𝘰𝘯𝘨 𝘴𝘪 𝘊𝘦𝘴𝘢𝘳 𝘋𝘰𝘮𝘪𝘯𝘨𝘰 𝘖𝘥𝘵𝘰𝘩𝘢𝘯 𝘰 𝘮𝘢𝘴 𝘬𝘪𝘭𝘢𝘭𝘢𝘯𝘨 “𝘑𝘰𝘦𝘺 𝘎𝘢𝘯𝘥𝘢” 𝘱𝘢𝘨𝘥𝘢𝘵𝘪𝘯𝘨 𝘴𝘢 𝘪𝘯𝘥𝘶𝘴𝘵𝘳𝘪𝘺𝘢 𝘯𝘨 𝘩𝘢𝘪𝘳 𝘴𝘢𝘭𝘰𝘯.

Si “Joey Ganda” ay tubong Inagawan sa Lungsod ng Puerto Princesa.

Dagdag dito, siya ay isang construction supplier sa lalawigan ng Palawan. Founder at nagmamay-ari ng Puerto Princesa Queen of Queens, isang prestihiyosong pageant search para sa mga transwomen sa lalawigan; siya rin ang may-ari at head organizer ng Joey Ganda Productions, isa sa mga nag-oorganisa ng iba’t ibang pageant events sa Palawan.

Limang (5) beses din siyang naging partnered-organizer ng Carousel Productions, isang produksiyon sa likod ng Miss Philippines Earth pageant. Nakaraang taon, dinala ni Joey Ganda ang Miss Philippines Earth 2022 sa bayan ng Coron at doon ginanap ang grand coronation ng nasabing prestigious pageant sa bansa.

Samantala, sa mga nakalipas na taon, niyakap ni “Joey Ganda” ang adbokasiyang nagbibigay kaalaman at kampanya laban sa sakit na Human Immunodeficiency Virus o mas kilalang HIV.

Sa kagustuhan niyang makatulong sa mga miyembro ng Lesbian, Gay, Bisexual, Transgender, Queer, Questioning, Intersex, Asexual+ Community, nais niyang isakatuparan ang magkaroon ng tamang kaalaman sa naturang sakit at mabigyan ng mga kaukulang tulong ang mga apektadong indibidwal partikular na ang LGBTQIA+ members laban dito.

Sa ngayon, si Joey Ganda ay nagmamay-ari ng dalawang salon sa lalawigan. Ang kaniyang mga salon branches sa Palawan ay matatagpuan sa Bgy. 1 sa bayan ng Coron at Robinson’s Place Palawan sa Lungsod ng Puerto Princesa.

Nitong nakalipas na buwan, nagbukas ang unang salon branch ni Joey Ganda sa Metro Manila, Enero sais (6) nang pinasinayaan niya ito sa Amang Rodriguez South Market sa Lungsod ng Pasig. At nitong ika-10 ng Mayo naman, nagbukas ang kaniyang ikalawang branch sa kamaynilaan. Ito ay mamatagpuan sa Lungosd ng Marikina.

“Pangalawang branch ko [sa Manila]… Nauna [‘yung sa Pasig City]… ‘Yung kaka-open lang, May 10, ‘yung sa [Marikina] branch. Ang [nag-cut] ng ribon [ay Ms. Evelyn Alvaran Cruz, CEO/Founder ng HAIR ASIA],” ani Joey Ganda.

Sa darating na buwan ng Hulyo, ngayong taon, magbubukas ang kaniyang ikalimang salon branch sa bansa na matatagpuan naman sa Cainta, Rizal.