𝗣𝗖𝗦𝗗𝗦, 𝗻𝗮𝗴𝘀𝗮𝗴𝗮𝘄𝗮 𝗻𝗴 𝘁𝗮𝘁𝗹𝗼𝗻𝗴 𝗮𝗿𝗮𝘄 𝗻𝗮 𝗮𝗸𝘁𝗶𝗯𝗶𝗱𝗮𝗱 𝘀𝗮 𝗕𝗮𝗿𝗮𝗻𝗴𝗮𝘆 𝗣𝘂𝗻𝘁𝗮-𝗕𝗮𝗷𝗮, 𝗥𝗶𝘇𝗮𝗹, 𝗣𝗮𝗹𝗮𝘄𝗮𝗻

Ni Vivian R. Bautista

KASALUKUYANG isinasagawa ng Palawan Council for Sustainable Development Staff (PCSDS) ECAN Education and Extension Division (EEED) ang tatlong araw na serye ukol sa “Capability Enhancement Activity” para sa mga miyembro ng municipal at barangay council, ECAN Board members, at Sangguniang Bayan na nagsimula nitong ika-19 hanggang 21 ng Hulyo, 2023 na ginanap sa Municipal Event Center, Purok Liwayway, Barangay Punta-Baja, Rizal, Palawan.

Kaisa ng nasabing ahensya ang PCSDS District Management Division (DMD)-South sa pagsasagawa ng nasabing aktibidad na layon ay upang mapataas ang kaalaman at kasanayan ng mga kalahok ukol sa mga probisyon ng Strategic Environmental Plan (SEP) Law, partikular na sa Republic Act No. 9175 o Chainsaw Act; RA 9147 o Wildlife Conservation Act; PCSDS Administrative Order No. 11 o ang “Mga Panuntunan at Regulasyon na Namamahala sa Konserbasyon at Proteksyon ng mga lugar ng Bakawan,”; at Orientation on Sustainable Development Goals Number 14 at 15: Life Below Water and Life on Land.

Ang nasabing kaganapan ay kahalintulad umano ng Training Needs Assessment (TNA) na una nang isinagawa noon pang Disyembre taong 2022 ng mga kawani ng PCSDS na ginanap sa Barangay Candawaga, Rizal na kung saan ay naisiwalat kung aling aspeto ng mga batas at patakaran ng nasabing ahensya ang kailangang palakasin at bigyang-prayoridad para sa higit na kamalayan ng naturang munisipyo, batay sa Facebook post ng PCSD.