Matagumpay na naaresto ng mga awtoridad ang 42-anyos na lalaki na kinilalang si alyas “Melchor”, isang welder, at drug convict under probation na residente ng Brgy. Poblacion 1 sa bayan ng Coron, Palawan, nitong nakalipas na Huwebes, Pebrero 27.
Naging posible ang isinagawang operasyon sa pamamagitan ng sanib-puwersang pagtutulungan ng Coron Municipal Police Station (MPS), Palawan Provincial Drug Enforcement Unit (PDEU), at Provincial Intelligence Unit (PIU) at ng Palawan Police Provincial Office.
Nakumpiska sa suspek ang isang (1) transparent plastic sachet na naglalaman ng tinatayang limang (5) gramo ng hinihinalang shabu, isang (1) tunay na ₱1,000 at 15 piraso na pekeng ₱1,000 na ginamit bilang buy-bust money.
Nakuha rin sa suspek ang isang (1) glass pipe o kilalang “bola-bola” na karaniwang ginagamit sa pagsunog ng shabu, isang (1) lighter, isang (1) cellphone, at isang (1) motorsiklo na ginamit sa transaksyon.
Lumalabas sa imbestigasyon na nakabili ang mga awtoridad sa suspek ng isang (1) transparent plastic sachet na naglalaman ng tinatayang 5 gramo ng hinihinalang shabu na may halagang ₱24,000.00 na nagresulta sa pagkaaresto nito ng Anti-Drug Abuse Council (BADAC) ng nabanggit na barangay.
Tinatayang nasa ₱48,000.00 na kabuuang halaga ng sampung (10) gramo ng droga ang narekober sa suspek.
Samantala, kasalukuyang nasa kustodiya ng Coron MPS ang suspek at nahaharap sa paglabag sa Seksyon 5 at 11 ng Republic Act 9165 (Comprehensive Dangerous Drugs Act of 2002) na inihahanda at isasampa sa National Prosecutor Service. | via Lars Rodriguez
Author
About the Author
