Ni Marie F. Fulgarinas
PUERTO PRINESA CITY — Bangkay na nang matagpuan ng mga awtoridad ang katawan ng lalaki na palutang-lutang sa ilog ng Bgy. Pulot Shore, sa nabanggit na bayan nitong hapon ng Huwebes, May 30.
Sa report ng Philippine National Police Sofronio Española Station, kinilala ang biktima na si Raden Hasan na sinasabing umalis sa kanilang bahay bandang alas-siyete y midya (7:30 a.m.) nang umaga upang magpastol ng kaniyang mga alagang baka. Ngunit sa kasamaang palad, hindi na nakabalik ang biktima.
Nang hanapin ng mga awtoridad si Hasan sa nabanggit na lugar, dito na natagpuan ang katawan nito na palutang-lutang sa ilog ng Barangay Pulot Shore.
Agaran namang nirekober ang katawan nito at isinailalim sa otopsiya ng Municipal Health Office upang matukoy ang dahilan ng pagkamatay ng biktima.