Pinangunahan ni Gobernador Victorino Dennis M. Socrates kasama ang iba pang opisyales ng Pamahalaang Panlalawigan ang pormal na pagbubukas ng Baragatan Festival 2025 sa Palawan ngayong araw ng Biyernes, Hunyo 13.
Ang kapiyestahan ay may temang “Pagtitipon ng mga nagkakaisang Palawenyo. Selebrasyon ng mayamang sining, tradisyon at kultura. Pagtatanghal ng lakas, talino, talento at produkto. Makiisa at makisaya sa Baragatan ngayong taon ng pag-asa”.
Sa mensahe ng Gobernador, sinabi nitong ang punto ng pagdiriwang na ito ay lalo pang palakasin ang ating pag-ibig at pagkakaisa upang ibahagi hindi lamang sa mga kapwa Palawenyo kundi sa buong mundo.
“Ito ay pagtitipon nating mga Palawenyo, kaibigan at kamag-anak at mga panauhin sa iba’t ibang dako ng daigdig upang ipagdiwang ang ating pagiging sambayanan.
Sambayanan tayo dahil mayroong tayong pagkakaisa bilang Palawenyo, nagkakaisa dahil pinagbuklod ng pag-ibig—pag-ibig sa isa’t isa at sa kabutihang panlahat,” ani Gob. Socrates.
Dagdag pa ng opisyal, ngayong taon ang kanyang huling Baragatan bilang ama ng lalawigan ng Palawan kaya naman itinuturing niya itong ‘Best Baragatan Ever’ ngunit binigyang-diin na dapat tuwing ipinagdiriwang ang naturang festival ito ay maging ‘Baragatan Ever’ —humihigit o lumalagpas sa kahusayan ng nakaraang sinusundan.
Pahayag pa ng Gobernador, nawa’y maging panahon din ito ng pagpapatawad at paghilom ng mga sugat na tinamo sa nagdaang halalan.
Hiningi rin nito ang patuloy na panalangin para sa kabutihan ng ating mga pinuno sa pamahalaan para rin sa kabutihang panlahat ng ating sambayanan.
Sa huli, nagpasalamat si Gob. Socrates sa patuloy na suporta at pakikilahok ng mga Palawenyo sa taunang pagdiriwang ng Baragatan Festival.
Author
About the Author
