Photo courtesy: Puerto Princesa City Police Office-Station 2
Arestado ng mga kapulisan ng Puerto Princesa City Police Office (PPCPO) ang lalaking umano’y pumasok at nagnakaw sa isang boarding house sa Barangay Tiniguiban sa lungsod ng Puerto Princesa.
Batay sa imbestigasyon ng City Police Office, bandang alas-5:30 ng madaling araw nang pasukin ng suspek ang inuupahang boarding house ng 26-anyos na biktima sa Purok San Francisco 2 sa nasabing barangay.
Naaktuhan naman ng biktimang babae ang insidente kaya mabilis na tumakas ang suspek sa ‘di malamang direksyon.
Agad na tumungo ang biktima sa tanggapan ng Police Station 2 upang ipagbigay-alam ang insidente. Humingi rin ng agarang saklolo sa naka-on duty na Barangay Tanod sa lugar ang biktima.
Mabilis namang hinanap ng mga Bgy. Tanod ang mga kuha ng CCTV mula sa barangay na kung saan agarang nakilala ang suspek.
Agad na ikinasa ng mga awtoridad ang hot pursuit operation dahilan para maaresto ang suspek.
Kinilala ng mga awtoridad ang suspek na isang 21-anyos na lalaki na empleyado ng isang gas station at residente rin ng nasabing barangay.
Nakuha mula sa pangangalaga ng suspek ang mga ninakaw nitong gamit kabilang na isang kwintas na nagkakahalaga ng ₱15,000, apat na ATM cards, isang driver’s license, at ₱1,000 cash.
Nakatakda namang sampahan ng kaukulang kaso ang suspek na hawak na ngayon ng PS2.
