DOH, nagbabala sa publiko sa nararanasang tag-init sa bansa

Dahil sa mainit na temperaturang nararanasan ngayon sa iba’t ibang bahagi ng bansa, nagpaalala ang Department of Health (DOH) laban sa mga sakit na may kaugnayan sa init na dala ng matinding mainit na temperatura.

Ayon sa tala ng Philippine Atmospheric Geophysical Astronomical Administration (PAGASA), nakaranas kamakailan ng heat index na umabot sa 46 degrees Celsius ang Metro Manila kasama ang ilang lungsod at probinsya ng Pampanga, Nueva Ecija, Bataan, at Olongapo City na pumasok sa “danger” heat index.

Ayon sa Kagawaran ng Kalusugan, ang temperaturang mula 33 hanggang 41 degrees Celsius ay inuri ng PAGASA bilang “extreme caution”, habang nasa kategorya naman ng “danger” ang 42° Celsius hanggang 52° Celsius

Ayon pa sa Kagawaran, ang mga nabanggit na temperatura ay posibleng magdala ng iba’t ibang uri ng kondisyon o sakit kabilang dito ang heat cramps o pamumulikat at heat exhaution o pagkahapo na may mga sintomas gaya ng pagkapagod, pagkahilo, sakit ng ulo, at pagsusuka.

Kung sakali mang makaranas ng ganitong mga sintomas, pinapayuhan ang publiko na gamitin ang mga sumusunod na hakbang sa pang-unang lunas:

Ayusin ang bentilasyon, ilipat ang tao o pasyenteng nakararanas ng kahalintulad na kondisyon sa isang malilim at malamig na lugar. Tanggalin ang panlabas na damit ng tao. Maglagay ng malamig na compress, ice pack, malamig na tubig, o malamig na basang tela sa balat lalo na sa bandang ulo, mukha, leeg, kilikili, pulso, bukung-bukong, at singit.

Kung ang pasyente ay nagkaroon na ng malay, hikayatin itong uminom ng tubig pa unti-unti o mabagal na pagsipsip ng malamig na tubig.

Dalhin agad ang pasyente sa pinakamalapit na pagamutan.

“Kaya nating iwasan ang mga heat illnesses o sakit sa init. Alamin mula sa PAGASA ang heat index. Pagibayuhin ang pag-ingat, lalo na kapag ang heat index ay nasa 33 Celcius na,” pahayag ni Health Secretary Teodoro J. Herbosa.

“Kapag umabot o lumampas na ng 42 Celcius ang heat index, ‘danger’ na ‘yan, dalasan ang pag-inom ng malinis na tubig, at umiwas sa araw mula 10 a.m. hanggang 4 p.m,”dagdag pa ni Herbosa.

Ang matagal na paglalagi sa init ay nagpapataas umano ng posibilidad ng heat stroke, isang seryosong kondisyon na may pagkawala ng malay, pagkalito, o kaya ay mga seizure o kombulsyon, na maaaring makamatay kung hindi agad maagapan o magagamot.

Panawagan din ng DOH sa publiko na regular na umantabay sa mga ulat mula sa PAGASA upang magkaroon ng ilang kaalaman kung papaano maiiwasan ang mga kondisyon at sakit na dulot ng tag-init.

Mangyari ring umiwas muna sa inuming nakakauhaw gaya nang iced tea, softdrinks, kape, o mga inuming may alcohol; bawasan ang paggugol ng oras sa labas sa pagitan ng mga itinakdang delikadong oras.

Pinapayuhan din ang publiko na gumamit ng mga proteksyon laban sa init gaya ng sumbrero, payong, sunblock, at panatilihing magsuot ng maluluwag o komportableng kasuotan.