Nilagdaan na ni Gobernador Victorino Dennis M. Socrates ang Provincial Ordinance No. 3646, series of 2025, o ang “Declaration of a Fifty (50) Year Extendable Moratorium on the Issuance of Endorsements for All Large and Small-Scale Mining Applications sa Old Governor’s Residence, Lungsod ng Puerto Princesa, nitong araw ng Huwebes, Marso 13.
Matatandaan, halos isang buwang pinag-usapan ang nasabing ordinansa sa committee hearing ng Sangguniang Panlalawigan. Matapos ang apat (4) na pagdinig ay matagumpay na naipanalo ang nasabing ordinansa kung saan nakakuha ito ng unanimous votes sa lahat ng bokal ng Sanggunian.
Ayon kay Cynthia Sumagaysay-del Rosario mula sa Save Palawan Movement (SPM), isang makasaysayang pangyayari ang paglagda ng ordinansang 50-year mining moratorium.
“Ang pagpirma ng ating Gobernador sa ordinansa na nagtataguyod ng moratorium sa pag-eendorso ng Sangguniang Panlalawigan sa lahat ng mga large and small scale commercial mining operations sa probinsya sa loob ng limampung (50) taon ay isang makasaysayang hakbang upang mapangalangaan natin ang higit sa dalawandaang libong ektaryang kagubatan na saklaw ng mga nakabinbin na mga aplikasyon sa pagmimina,” pahayag ni Sumagaysay.
Aniya pa, ang pagsasagawa nito ay isa ring mahalagang paggunita sa nangyaring plebesito noong March 13, 2021, kung saan nagwagi ang pagtutol ng mga Palaweño sa batas na hatiin sa tatlo ang probinsya ng Palawan.
Nagpaabot din ng pasasalamat si Gob. Socrates at ang mga orihinal na author ng nasabing ordinansa na sina Board Member Nieves Rosento at IPMR Arnel Abrina.
“Sa simula hindi ko naman na appreciate itong ordinansang ito nagkataon lang na lumabas doon sa Palawan Stakeholder’s Congress on mining and the environment na gusto pala ng sambayanang Palaweño na itigil ang pagpasok ng mga bagong minahan. Hindi ko masyadong maintindihan noon but because of that, nai-suggest natin, at nagpapasalamat ako sa tatlong minority members of the Sangguniang Board Member Nieves Rosento, Board Member Ma. Angela Sabando, at Board Member Arnel Abrina, kahit minorya sila ay unti-unting nilaban nila ang ordinansa of mining at ngayon po ay pumasa at nanalo ang minorya,” pahayag ni Gob. Socrates
Nakasaad sa Ordinance No. 3646 na ipagbabawal ang pag-iisyu ng endorsement para sa lahat ng aplikasyon kaugnay ng exploration permits, mineral agreements, at financial o technical assistance agreements sa loob ng limang dekada o higit pa.
Sa ilalim din nito, bubuo ng isang Mining Moratorium Council upang tiyakin ang pagsunod sa mga ipinatutupad na polisiya.
Samantala, ang seremonyang ito ay dinaluhan ng mga matataas na opisyal at mga kinatawan mula sa NGOs, grupo ng mga katutubo sa lalawigan, civil society groups, Save Palawan Movement, Apostolic Vicariate of Puerto Princesa, at mga lokal na midya.