IKINABABAHALA ng Department of Health (DOH) ang patuloy na paglaganap ng mga kaso ng Human Immunodeficiency Virus (HIV) sa buong bansa na pumalo na sa 500 porysento sa mga kabataan na nasa edad 15 hanggang 25-taong gulang.
Inihayag ni DOH Secretary Dr. Teodoro “Ted” J. Herbosa na mas pinangangambahang problema sa kasalukuyan ng bansa ang patuloy na pagtaas ng kaso ng HIV kaysa monkeypox.
“In fact, ang pinakabatang na-diagnose po natin ay [13-anyos] sa probinsya ng Palawan. So, ang malaking problema po natin hindi monkeypox kundi ang paglaganap ng HIV,” ani Herbosa.
Batay sa ibinahaging datos, ang Pilipinas na ang may pinakamataas na naitatalang bagong kaso sa Western Pacific Region, bagay na ikinatatakot ng Kagawaran dahil sa mga bagong kasong naitatala sa mga kabataang Pilipino.
Maaaring lumagpas ng 400,000 ang bilang ng mga taong may HIV sa bansa kung hindi maaagapan ang paglaganap nito.
“Mahal po ang pagbayad ng mga gamot ng anti-retroviral. Kaya kailangang kailangan na ma-increase natin ang testing, prevention, treatment at nang bumaba ang viral load,” dagdag niya.
Bagaman maaari nang gamutin ang HIV sa pamamagitan ng treatment upang hindi lumala, ipinanawagan ng Kalihim ang public health national emergency para labanan ang nasabing sakit sa pamamagitan ng pagtutulungan ng publiko at gobyerno upang mapababa ang naitatalang bagong kaso.
Aniya, mayroon nang self-test kits sa bansa na inaasahang magamit ng mga taong natatakot sa stigma ng pagpapa-test. Ito ay maaaring mabili sa mga botika na kung saan isasagawa naman ang confirmatory test sa HIV treatment hub.
Ani Herbosa, sagot ng Philippine Health Insurance Corporation (Philhealth) ang mga gamot na anti-retroviral para maagapan ang nasabing sakit.
Samantala, isa ang 30-taong gulang na si Lorenz Olleres na patuloy na namumuhay ng normal nang may HIV sa loob ng 11 taon, na undetectable na ang kanyang kasalukuyang status dahil sa treatment.
“Eleven years from now, I am still living healthy and I am already undetectable a year after I started the medication—moving forward and living my life. Living with HIV, I still achieved my dreams I graduated college nu’ng [mayroon] akong HIV and that is because the free treatment that we have here in the Philippines.”
