Nanawagan si Palawan First District Board Member Ma. Angela Sabando sa mga kinauukulan at simbahan na paigtingin ang mga kampanya’t programa sa pagsugpo ng lumalalang kaso ng Human Immunodeficiency Virus o HIV sa lalawigan.
Sa kaniyang privilege speech nitong Martes, Hunyo 10, 2025, inihayag nito na kailangang magkaroon ng kolektibong aksiyon upang tugunan ang lumalalang epidemya na kung saan pabata nang pabata ang nagiging biktima nito sa lalawigan ng Palawan.
“Nananawagan [ako] sa lahat ng opisyal ng pamahalaan, simbahan, institusyon ng edukasyon, at midya na palakasin ang kampanya laban sa pagtaas ng kaso ng HIV sa ating bansa,” paglalahad nito.
Inilatag din ni Sabando ang datos mula sa Kagawaran ng Kalusugan o Department of Health (DOH) at inihayag na mabilis ang pagtaas ng kaso sa mga kabataang kalalakihan. Aniya, malaking bilang ng kaso ay nagmula sa Lungsod ng Puerto Princesa sa datos na 656 positive cases.
“Sa Palawan, mula taong 2015 hanggang 2025, may kabuuang 1,268 na naitalang kaso ng HIV kabilang dito ang 656 mula sa Puerto Princesa, 73 mula sa Narra, 67 sa Taytay, 65 sa Brooke’s Point, 62 sa Roxas, 55 sa Aborlan, 44 sa El Nido, 29 sa Bataraza, 26 sa Quezon at San Vicente, 20 sa Dumaran, 18 sa Coron, 16 sa Sofronio Española, 15 sa Rizal, 14 sa Cuyo, 11 sa Araceli, 6 sa Busuanga at Balabac, 5 sa Culion, 4 sa Cagayancillo, 3 sa Agutaya, 1 sa Magsaysay at Linapacan, at sa labas ng Palawan ay 46 na [bilang],” ayon pa sa opisyal.
Sinabi rin ni Sabando na mataas ang bilang ng epidemya mula sa male-to-male relationship na pangunahing dahilan umano ng pagkalat ng virus. Inihayag din nito na edad 24-taong gulang pababa ang mayroong HIV sa Palawan.
“Mahigit animnapu’t anim (66) mula sa mga kabataang may edad na 24-years-old pababa. Sa mga kaso, 1003 ay naitalang resulta ng relasyon ng lalaki sa lalaki bilang pangunahing paraan ng pagkalat,” dagdag pa ng opisyal.
Ayon pa kay sabando, sa tala ng DOH, kabuuang 974 lamang umano mula sa 1,268 confirmed cases ang kasalukuyang sumasailalim sa Antiretroviral Therapy o ART.
“Sa kabutihang palad, 974 sa mga pasyente ay kasalukuyang nakatatanggap ng Antiretroviral Therapy o ART, isang gamot na tumutulong upang matigil ang pagpasa ng HIV at mapanatili ang kalusugan ng may ganitong [uri ng] karamdaman.
Ito ay isang seryosong banta sa kalusugan ng publiko na nangangailangan ng mas malawak at masinsinang edukasyon, impormasyon, at pagkilos mula sa ating buong komunidad upang maprotektahan ang bawat mamamayan,” saad pa nito.
Author
About the Author
