Ni Marie F. Fulgarinas
PUERTO PRINCESA CITY — Agad na binawian ng buhay ang isang 29-anyos na lalaki makaraaang tagain ng kanyang nakatatandang kapatid sa bayan ng Aborlan, Palawan, nitong Martes nang gabi, Abril 16.
Ayon sa pulisya, ang biktima ay binata habang ang suspek naman ay ang kaniyang kuya na si alias “Onad”, 43-taong gulang, may-asawa, at magsasaka na parehong residente ng Barangay Sagpangan, nabanggit na bayan.
Sa panayam ng lokal midya sa suspek, pinuntahan umano siya ng kaniyang kapatid nitong gabi ng Martes habang nakainom ng alak at nagkaroon sila ng matinding pagtatalo.
Aniya, nagkasuntukan muna sila at hinampas siya ng kawali ng kaniyang kapatid na kung saan inundayan naman nito ng taga ang biktima.
Sumuko naman ang suspek bandang 1:30 nang madaling araw sa pamunuan ng Aborlan Municipal Police Station dala ang ginamit na patalim at isinalaysay ang nangyaring krimen.
Nang marating ng mga awtoridad ang crime scene sa Purok Bagong Silang, inabutan ng mga ito na nakahandusay ang duguang katawan ng biktima at wala nang buhay.