Kuhang larawan: Provincial Information Office (PIO) Palawan
Matagumpay na nadepensahan ng Lokal na Pamahalaan ng Magsaysay ang kanilang titulo bilang Grand Champion sa Pantigoan sa Dalan, isang tampok na kompetisyon sa Baragatan sa Palawan Festival 2025.
Pinakamaningning sa limang munisipyong lumahok ang bayan ng Magsaysay matapos ipamalas ang kanilang husay sa koreograpiya, harmonya ng galaw, at katangi-tanging disenyo ng kasuotan.
Dahilan para masungkit ng Magsaysay ang grand prize na P300,000 at plake. Bukod dito, napanalunan din ang tatlong special awards na kinabibilangan ng Best in Costume, Best in Choreography, at Best in Parade, na may P30,000.00 na cash prize bawat isang parangal, ayon sa tanggapan ng impormasyon ng kapitolyo.
Hinirang naman na 1st Runner-up ang LGU Quezon na taumanggap ng P200,000.00, habang ang LGU Coron ang naging 2nd Runner-up na may P100,000.00 na premyo.
Sa indibidwal na parangal, kinilala bilang Best Dancing Mayor si Magsaysay Mayor Rommel Dela Torre, habang si Vice Mayor Aloysius Quejano ang hinirang na Best Dancing Vice Mayor na kung saan parehong tumanggap ng P10,000.00.
Pinarangalan naman ang mahusay na pagtatanghal ng LGU San Vicente at LGU Cagayancillo ng halagang P50,000.00 bilang consolation prize.
Nagmula ang salitang “Pantigoan” sa salitang Cuyonon na “antigo” na nangangahulugang husay, kaalaman, at kakayahan.
Sa kompetisyong ito, ang Pantigoan sa Dalan ay isang dance parade competition na bahagi ng Baragatan Festival ng Palawan na naglalayong itampok sa pamamagitan ng sayaw at makulay na pagtatanghal ang identitad ng bawat munisipalidad.
Author
About the Author
