Photo courtesy: Palawan Provincial Police Office
Natugis na ang tinaguriang Rank No. 1 Most Wanted Person sa bayan ng Taytay matapos ang mahigit isang buwan mula nang ilabas ang warrant of arrest laban sa kaniya.
Ika-29 ng Abril, taong kasalukuyan, nang mag-isyu ng arrest warrant si Presiding Judge Emmanuel O. Artzao, 14th Judicial Family Court, Taytay, Palawan na matagumpay naman na nahuli ng pulisya ang 36-taong gulang na most wanted na kinilalang alyas “Dindo” nitong Hunyo 3.
Sa pamamagitan ng isang malawakang manhunt operation na isinagawa ng Taytay Municipal Police Station katuwang ang Provincial Intelligence Unit (PIU) Palawan Provincial Police Office (PPO), 2nd Provincial Mobile Force Company (PMFC), Regional Mobile Force Battalion (RMFB) 4B naging matagumpay ang pagkakatimbog sa taong may pananagutan sa batas na napag-alamang isang drayber at residente ng Barangay Poblacion ng nasabing lugar.
Ang mga kasong isinampa laban sa kaniya ay paglabag sa Section 5(a), 5(b), 5(1) kaugnay ng Section 6(a) ng Republic Act 9262 o Anti-Violence Against Women and Children Act, na may kabuuang itinakdang piyansa na P254,000.00.
Si alyas “Dindo” ay kasalukuyang nasa kustodiya ng pulisya para sa kaukulang dokumento at tamang disposisyon.
Samantala, patuloy na pinaiigting ng Palawan PPO sa ilalim ng pamumuno ni PCOL. Joel D. Casupanan, Provincial Director ang operasyon laban sa kriminalidad, lalo na sa pagsugpo sa karahasan laban sa kababaihan at kabataan upang mapanatili ang kaayusan at seguridad sa komunidad. | Photo courtesy: Palawan PPO
Author
About the Author
