Photo courtesy: Palawan Council for Sustainable Development and Staff (PCSDS)
Dalawang (2) Asian Small-clawed Otter o Dungon ang nakita sa bakawan ng Barangay San Manuel na kung saan tila naipit ang isa sa pagitan ng mga ugat habang sinusubukan naman hatakin ng kaniyang kasama upang mailigtas.
Ang nakakaantig na tagpong iyon ay nasaksihan ng nanginginas lamang sa bakawan ng nasabing barangay nang kaniyang mapansin ang dalawang dungon na nasa bakawan at nilapitan para tulungan. Ngunit agad tumakas ang isang dungon at tuluyang tumakbo palayo habang naiwan ang kasamang hindi makaalis sa kinalalagyan, ayon sa Palawan Council for Sustainable Development (PCSD).
Dahil sa pangambang malagay sa panganib ang buhay-ilang, agad na tinulungan ang naipit na dungon sa bakawan at minabuting hanapan ito ng tamang pangangalaga kaya naman ipinagkatiwala ito sa kaniyang kakilala nasi Ginoong Jerry Boy Nillasca, residente ng naturang barangay ng lungsod ng Puerto Princesa, na siya naman personal na nag-turn over sa nasabing ahensya.
Ang Asian Small-clawed Otter o may siyentipikong pangalan na Aonyx cinera ay pinakamaliit na uri ng otter sa buong mundo. Batay naman sa ibinahaging impormasyon ng PCSD, ang nasabing dungon ay likas na “social animals”, mas komportableng namumuhay sa maliit na grupo o pamilya. Madalas silang nakikitang naglalaro, nagtutulungaan, at nagpapahayag ng pagkalinga sa isa’t isa.
Itinuturing na endangered species ito, ayon sa PCSD Resolution No. 23-967, na kung saan unti-unting bumababa ang kanilang populasyon dahil sa patuloy na pagkawala ng kanilang natural na tirahan, panghuhuli, at iba pang banta ng kalikasan.
Samantala, nasa maayos naman na kondisyon ang nailigtas na dungon nang dalhin ito sa Palawa Wildlife Rescue and Conservation Center (PWRCC) at PCSD. Inilahad din ni Dr. Glenn Rebong, PCSDS Veterinarian, walang nakitang sugat o anumang problema sa kalusugan ng otter, kaya’t matapos ang masusing pagususri, agad itong pinakawalan sa isang ligtas na bahagi ng kanyang natural na tirahan.
