Photo courtesy: DOST-PAGASA
PUERTO PRINCESA CITY — Wala nang binabantayang bagyo o Low Pressure Area (LPA) sa loob at labas ng Philippine Area of Responsibility (PAR) ang Department of Science and Technology-Philippine Atmospheric, Geophysical and Astronomical Services Administration o DOST- PAGASA.
Sa ulat ni Weather Specialist Grace Castañeda ng DOST- PAGASA ngayong araw ng Sabado, Hunyo 14, bagaman wala nang mino-monitor na anumang sama ng panahon, patuloy pa rin na makararanas ng mga pag-ulan ang buong bahagi ng Mindanao at Eastern Visayas dulot ng Intertropical Convergence Zone o ITCZ kaya pinag-iingat ang publiko sa mga posibleng pagbaha at pagguho ng lupa.
“Dito naman sa buong bahagi ng Mindanao maging sa area [r]in ng Eastern Visayas, magiging maulap po ang ating kalangitan at mayroong mga kalat-kalat na pag-ulan, pagkulog at pagkidlat na mararanasan dulot…ng ITCZ.
Itong mga pag-ulan na ito ay posibleng [sa katamtaman] hanggang sa mga malalakas na pag-ulan kaya naman pag-iingat po para sa ating mga kababayan sa posibilidad ng mga pagbaha at pagguho ng lupa,” ang paalala ni Castañeda.
Batay pa sa ulat, easterlies o mainit na hangin na nagmumula sa dagat Pacifico ang umiiral sa malaking bahagi ng Luzon at nalalabing lugar sa Visayas.
“Magdudulot po itong easterlies ngayong araw ng malaking tiyansa ng mga pag-ulan dito sa bahagi ng extreme Northern Luzon,” dagdag pa ng Weather Specialist. Samantala, ang lalawigan ng Palawan ay makararanas ng mga biglaang pag-ulan, pagkulog at pagkidlat na dulot pa rin ng easterlies. Wala na rin umanong direktang epekto ang Southwest Monsoon o Habagat sa alinmang bahagi ng bansa.
