Pinuna ni dating Konsehal Atty. Peter ‘Jimbo’ Maristela ang umano’y ilang taong nakatenggang flood control project ng city government partikular sa barangay San Pedro, lungsod ng Puerto Princesa.
Aniya, noong siya ay kasalukuyan pang nakaupo bilang City Councilor, ang proyekto ay pinondohan ng 120 milyong piso.
“Siguro mga apat na taon na habang tayo ay dumadaan dito sa Peneyra Road ay nakikita natin ito [mga nakatambak na culvert]. Ano na nga ba ang development nito?”
Ang alam ko po, Konsehal pa ako noon, ito ay napondohan ng P120 milyon para sa flood control dito sa Barangay San Pedro partikular dito sa Peneyra Road hanggang bago dumating doon sa Libis Road,” ayon sa dating konsehal.
Dahil dito, nagbigay ng update ang City Engineering Office patungkol sa estado ng proyekto.
Ayon kay Engr. Kenneth Alcala, Project-in-charge ng nabanggit na proyekto, nakapaglagay na ng mga culvert sa Ligaya Road, Camacho Rd. hanggang Libis Rd. patungong Factor Rd, pinakadulong bahagi ng proyekto.
“Sa ngayon po, ‘yun ang nagawa sa project at tinambakan natin ‘yun at mayroon tayong mga pini-prepare na road at may mga nasemento na sa bandang Ligaya at Factor road. Ngayon po, on going ang pagsesemento sa Factor road,” ang pagbibigay update ni Alcala sa Flood Control Project.
Aniya, ang groundbreaking ng proyekto ay nangyari noon pang Enero 15, 2021, at buwan ng Abril naman nasimulan ang implementasyon nito.
Matatandaan, alinsabay sa paggulong ng proyekto ang mga ipinaiiral na community quarantine bilang pag-iingat sa pagkalat ng Covid-19 kaya naman nagdulot ito ng delay sa implementasyon.
Maliban dito, may mga land owners din umano ang nagreklamo hinggil sa proyekto.
“During ng time na ‘yun [mayroon] tayong mga GCQ, ECQ. Medyo nahirapan tayo sa pag-mobilize ng mga tao sa paggawa at may mga restrictions du’n sa ating mga materyales. ‘Yun po ang naging initial na takbo ng project.
During implementation, dapat mag-start kami, [mayroon] pong mga ilan na nag-oppose na establishment kasi ang outfall po ng ating project which nandoon sa national highway,” paliwanag ni Alcala.
Personal naman na tinungo ni City Information Officer Richard Ligad ang lugar kung saan inilalatag ang flood control project at para na rin magbigay ng karagdagang update sa publiko kaugnay sa estado nito.
Aniya, simula Peneyra Rd. papuntang Libis Rd. ay nalagyan na ng box culvert.
“Buhat dito sa Peneyra road, Ligaya Street tagos d’un sa libis ay mayroon ng box culvert na malalaki na nakabaon, so at least, gumugulong na kung makikita [ninyo] ang trabaho sesementuhin na rin nila ‘yun hanggang doon— [iyon ang] mga bahagi ng ating flood control project,” ayon kay CIO Ligad.
Dahil sa konstruksyon ng proyekto, kalahating bahagi lamang ng Peneyra Rd. ang maaaring daanan.
Inirekomenda naman ng opisyal ang paghahanap ng alternatibong ruta para bigyang-daan ang nabanggit na proyekto.
“Konting sakripisyo lang po tayo ‘pag ginagawa natin ang proyekto ng ating gobyerno dahil kapag natapos naman ito kaginhawaan naman ang maidudulot nito sa atin,” pakiusap ng opisyal.
Author
About the Author
