NATIKLO ng mga awtoridad sa covered gym ng Barangay Maligaya sa bayan ng El Nido ang dalawang Children in Conflict with the Law (CICL) matapos silang maakusahan ng pagnanakaw at makumpiskahan ng iligal na droga bandang 1:30 ng madaling araw ng ika-31 ng Mayo, taong kasalukuyan.
Batay sa impormasyong ibinahagi ng Palawan Provincial Police Office (PPO), itinimbre ng concerned citizen ang impormasyon hinggil sa insidente ng pagnanakaw bandang 12:30 ng hating gabi ng araw ring iyon. Mabilis naman tumugon ang mga awtoridad sa pangunguna ng El Nido Municipal Police Station (MPS) para rumesponde sa dalawang CICL sa nasabing lugar.
Positibo naman kinilala ng biktima ang mga kabataang sangkot sa tulong ng kinatawan ng Municipal Social Welfare and Development (MSWD) at isang opisyal ng barangay.
Matapos ang operasyon, iba’t ibang bagay ang narwjober mula sa dalawang menor de edad, kabilang ang mga electronic devices, pera, at hinihinalang iligal na droga.
Nakuha sa unang CICL ang isang unit ng kulay black/blue na iPhone, tatlong perang papel ng Indonesian currency, dalawang piraso ng pakete na naglalaman ng tuyong dahon ng hinihinalang marijuana na may timbang na 1.4 gramo na nagkakahalaga naman ng P350.00.
Dagdag pa rito ang isang kahon ng Winston cigarette na may dalawang stick, at isang unit ng iPhone na may itim na casing.
Nakumpiska naman sa pangalawang CICL ang pera na nagkakahalaga ng P2,500, at isang pakete rin na naglalaman ng tuyong dahon na hinihinalang marijuana na may timbang na 1.5 gramo na nagkakahalaga ng halagang P400.00.
Sa kasalukuyan, isinasagawa ng pulisya ang kaukulang dokumentasyon para sa kaso habang nasa kustodiya naman ng kinauukulang ahensya ang mga kabataang nasangkot upang tiyakin ang tamang proseso alinsunod sa batas na nagpoprotekta sa mga CICL.
About the Author
