Nagtamo ng sugat sa bandang tiyan ang isang lalaki matapos itong saksakin ng kaniyang kainuman sa basketball court sa Brgy. Bato sa bayan ng Taytay, Palawan, bandang hating gabi ng Linggo, Disyembre 15.
Ayon sa inisyal na imbestigasyon ng kapulisan, nangyari ang insidente ng pananaksak matapos umanong magkainitan ang dalawa na parehong nakainom sa kasagsagan ng isang sayawan sa plaza. Bigla umanong inundayan ng saksak ang biktima na tinamaan sa bahaging tiyan nito.
Pinaghahanap naman ng kapulisan ang suspek na kinilalang si Alyas ‘Jake’ na tumakas matapos maganap ang insidente ng pananaksak.
Kasalukuyan namang nagpapagaling sa Northern Palawan Provincial Hospital ang biktimang si Alyas ‘Randya’, residente ng Barangay Bato sa nabanggit na bayan.