Ni Vivian R. Bautista
NITONG ika-23 hanggang 30 ng buwan ng Hunyo, ang Palawan Council for Sustainable Development and Staff (PCSDS) Marine Resources Initiative (MRI) Team ay nagsagawa ng mga serye ng pagpupulong at planning-workshops na ginanap sa Department of Foreign Affairs and Trade (DFAT) and Geoscience Australia Office, Canberra , Australian Capital Territory (ACT) sa University of Sydney, Sydney, Australia.
Ang mga aktibidad ay naglalayong suportahan ang pagpapaunlad ng mga kasanayan at kadalubhasaan sa pagtatatag ng awtoritatibong heograpiya sa lalawigan ng Palawan; tumutulong na makilala ang iba’t ibang uri ng may buhay at walang-buhay na yamang dagat at pagbutihin ang pag-unawa sa mga yamang ito; at suportahan ang pagbuo ng mga tugon sa patakaran sa lalawigan.
Ang pagsasanay na ito ay ginawa upang mapataas ang pagkakaunawaan sa pagitan ng Unibersidad ng Sydney, Geosciences Australia at PCSDS ukol sa mga istratehiya at pamamaraan na isasagawa na humahantong sa paglalagay ng mga importansiya sa mga yamang-dagat sa baybayin at mga serbisyo ng ekosistema, bilang bahagi ng mga aktibidad ng MRI na pinondohan ng DFAT, ayon sa PCSD.
Sa pag-unlad ng proyekto sa pakikipagtulungan ng Palawan Council for Sustainable Development at sa mga kawani nito, ipinaalam ng mga opisyal ng DFAT ang posibilidad na palawigin pa ang proyekto hanggang Hunyo 2026 kahit na mapapansing hanggang Hunyo 2024 lamang ang timeline nito.
Ang delegasyon ay binubuo nina Glenda M. Cadigal, District Management Division-South Manager; Engr. Madrono P. Cabrestante Jr., Chief, ECAN Monitoring and Evaluation Division (EMED); EnP. John Francisco A. Pontillas, Chief, ECAN Policy and Research Planning Division (EPRPD); EnP Cherry Lyn S. Jalover-Par, Staff, EPRPD; Dr. Arnica D. Mortillero; at Dr. Roger Dolorosa ng Western Philippines University (WPU).
Sa pagkilala sa malawak na marine at coastal environment ng Palawan, ang delegasyon ng Palawan ay lumahok din sa Blue Carbon Workshop na inorganisa ng University of Sydney noong Hunyo 26-28, 2023.
Dahil dito, binigyang-daan ng mga tauhan ng PCSD na mas maunawaan ang potensyal ng Palawan para sa blue carbon at blue carbon market at mga estratehiya nito. Gayundin, ang isang planning-workshop para sa Marine Ecosystem Services Valuation (MESV) ay isinagawa noong Hunyo 29 sa University of Sydney.
Samantala, nagtapos ang aktibidad sa isang pagpapakita ng kakayahan ng drone sa Great Mackerel Beach sa labas ng Sydney nitong Hunyo 30.