Photo courtesy | Busuanga Public Information
ISINOLI ng isang lalaki ang isang homemade na shotgun 12GA na walang serial number sa istasyon ng pulisya ng Busuanga, Palawan, nitong ika-28 ng Enero, taong kasalukuyan.
Base sa impormasyon, isang barangay tanod ang boluntaryong sumuko ng nasabing armas sa awtoridad na kinilalang si Leo Mantana Bacaltos, 43-taong gulang, at residente ng barangay San Rafael ng bayan ng Busuanga, Palawan.
Ayon kay Bacaltos, ang nasabing baril ay isinuko sa kanya ng isa sa mga residente ng kanilang barangay na natagpuan ito sa isang abandonadong bahay sa lugar.
Kasalukuyan naman nasa kustodiya ng istasyon ng pulisya ng Busuanga ang nasabing baril.
Ang pagsuko sa nasabing armas ay alinsunod ng pinaiigting na kampanya ng Philippine National Police (PNP) na Oplan Katok. Layunin nito na mabawasan ang bilang ng mga hindi rehistradong baril at mapanatili ang kapayapaan at kaayusan sa mga komunidad.
Sa pamamagitan ng pagbisita sa mga tahanan at paghimok sa mga may-ari ng baril na hindi rehistrado na boluntaryong isuko ang kanilang armas, nagiging mas ligtas ang mga barangay at komunidad.
Samantala, nasa 1,151 firearms ang boluntaryong isinuko ng iba’t ibang mamamayan mula Enero 1 hanggang Disyembre 31, 2024.
Umabot naman sa kabuuang 10,676 firearms ang naipon mula sa iba’t ibang operasyon ng kapulisan na kung saan nasa kustodiya ng mga lokal na pulisya ang mga nasabing baril upang maiwasan ang iligal na paggamit ng mga ito ng mga nagmamay-ari.
Author
About the Author
