NATIKTIKAN ng mga alagad ng batas ang kinaroroonan ng isang lalaki na may kinakaharap na kaso ng statutory rape na natimbog sa isang police operation.
Ayon sa police report, kinilala ang naarestong suspek na alyas “Jan”, isang laborer, at residente ng Barangay Iraan sa bayan ng Rizal, Palawan.
Nakalista ang naturang indibidwal na Most Wanted Person Rank No. 3 Provincial Level na dinakip nitong ika-6 ng Marso, taong kasalukuyan, sa pamamagitan ng isinagawang operasyon sa Barangay Iraan sa bayan ng Rizal.
Sa bisa ng Warrant of Arrest na nilagdaan ni Presiding Judge Ramon Chito R. Mendoza, Branch 165, Fourth Judicial Region, Regional Trial Court, Brooke’s Point, Palawan, na inilabas noong Hunyo 6, 2024, na nagresulta sa pagkakaaresto sa suspek na kung saan walang inirekomendang piyansa para sa kaniyang pansamantalang kalayaan.
Sa pamamagitan ng pinagsanib na operasyon ng Rizal Municipal Police Station (MPS), mga tauhan ng Palawan Provincial Police Office (PPO), MC, Regional Mobile Force Battalion (RMFB), at 1st Provincial Mobile Force Company (PMFC) nadakip ang ikatlo sa pinakamataas sa listahan ng top 10 most wanted person sa antas ng Panlalawigan.
Samantala, kasalukuyang nasa kustodiya ng pulisya sa bayan ng Rizal ang naarestong suspek para sa tamang dokumentasyon at karampatang aksyon.