“Lahat ng ginagawa namin ay ayon sa batas”- Matta

Clea Faye Cahayag March 9, 2025 2 minutes read

Dinepensahan ni PCSDS Executive Director Atty. Teodoro S. Matta ang Palawan Council for Sustainable Development (PCSD) kaugnay sa mga isyung ibinabato sa ahensiya at sa mga miyembro nito.

Ito ay kasunod nang naging pahayag kamakailan ni PCSD Chairman, Governor Victorino Dennis Socrates kung saan pinuna nito ang bigong pagsasagawa ng buwanang council meeting, mga proyektong nabibinbin dahil hindi pa na-iisyuhan ng SEP Clearance at expiration ng membership ng ilang miyembro ng konseho.

Ayon kay Matta bilang Executive Director at miyembro ng konseho lahat ng aksiyon na kanyang ginagawa ay alinsunod sa kanyang katungkulan sa republika.

Binigyang diin din nito na walang “corrupt” sa kanilang hanay dahil lahat ng desisyon at hakbang ng ahensiya ay dumadaan sa konsultasyon at naaayon sa batas.

“We present only the truth. We impute no wrong doing. We insinuate no bad faith and we only want to clear our names.

Wala kaming ginagawang masama. Lahat ng ginagawa namin ay ayon sa batas, ayon sa patakaran nakasulat, recorded. Wala kaming pinapalusot na papel, lahat dumadaan sa konsultasyon, lahat dumadaan sa konseho. Wala kaming katiwalian hindi dapat kami ginaganyan kung ano man yan. Huwag na kaming idamay sa kung anumang alitan dahil trabaho lamang kami. We are professional and we will continue to be professional diligent with integrity at your service.

We are the technical staff of the Palawan Council for Sustainable Development and that’s we are technical staff,” ang paliwanag ng opisyal sa Palawan Media.

Ayon kay Matta, sa ngayon ay wala pa silang legal action na gagawin sapagkat nais lamang anilang maitama ang mga maling paratang sa ahensiya at mga miyembro nito.