₱170.26, presyo kada kilo ng buhay na Baboy sa Palawan

Ni Albert Villamor Jr.

Haharap sa kaparusahan ang sinumang hindi susunod sa Minimum Farmgate Floor Price (MFFP) o naitakdang presyo para sa buhay na baboy sa lalawigan ng Palawan.

Ito ang nilalaman ng Executive Order No. 37, Series of 2026, na pirmado ni Gobernadora Amy R. Alvarez na ngayon ay epektibo na.

₱170.26 o ₱170.00 na ang kada kilo ng buhay ng baboy sa Palawan.

Ang naturang presyo ay ang halaga ng lahat na buhay na baboy na bibilihin sa, o mula sa Palawan.

“Any purchase of live hogs below the MFFP herein adopted, or any other violation of Sections 17,18,20, or 21 of the Ordinance, shall be subject to the administrative sactions and due process procedures under Sections 22, 23, and 24 thereof,” ayon sa Executive Order No. 37.

Ang mga kailangang gawin ng mga mamimili ng buhay ng baboy at nagbebenta ay: dapat hindi bumili ng buhay na baboy na mas mababa sa itinakdang presyo; mag-post ng mga kinakailangang businessness permit, provincial accreditation, at reference prices; magpatuloy ng tumpak na record ng mga transactions at magbigay ng mga resibo o purchase receipts; at hayaan ang inspeksyon na maaring isagawa ng kinauukulan.

Ang basehan ng naturang presyo ay ang resulta ng pagpupulong ng mga ahensiya ng pamahalaan at mga katuwang nito.

“PHPEC-verified Cost of Production of P160.26/kg plus a profit margin of P10.00/kg, effective September 22, 2026,” ayon sa Executive Order.

“The PHIPB shall formally review this MFFP at least once every six months, or earlier when market conditions so require, per Section 25 of the Ordinance,” dagdag pa nito.

Maari pa ring magbago ang presyo, depende sa pag-review ng Provincial Hog Price Executive Committee, na sumusunod sa recommended practice at statutory obligation nito.

Ang naturang presyo ay napagdesisyunan sa pamamagitan ng Provincial Hog Industry Price Board, Provincial Hog Price Executive Committee, Office of the Provincial Agriculturist, Provincial Veterenary Office, at Provincial Hog Industry Price Board, at iba pang may kinalamang grupo o indibidwal.

“Maraming salamat din po sa Tagapangulo ng Komite ng Pagsasaka at Pangisdaan na si Board Member Rafael Jr Ortega sa pagsisikap na matapos na ang mga polisiya na ito, Provincial Agriculturist Engr. Reniel Rocaberte, ProVet Darius Mangcucang, PHRA at iba pang mga grupo sa pagtitiyaga na mabuo na at matapos para may maipatupad na,” ayon sa Facebook post ni Board Member Ryan Maminta.