Isang mananaya na naman ang magsisimula ng magandang buhay ngayong bagong taon matapos mapanalunan ang kabuuang ₱314,591,292.80 jackpot prize sa Ultra Lotto 6/58.
Masayang inanunsyo ng Philippine Charity Sweepstakes Office (PCSO) na maswerteng nahulaan ng isang mananaya ang tamang winning combination numbers na 36, 46, 16, 19, 23, 27 na binola kagabi ika-5 ng Enero, taong kasalukuyan.
Base sa impormasyon, ang lotto winner ay tumaya sa Lucky Circle Corporation, SM Megamall, Mandaluyong.
Kabilang ang nasabing mananaya ng lotto sa mga naging instant milyonaryo matapos ang sunud-sunod na pagkakapanalo ng milyun-milyong papremyong handog ng PCSO ilang araw bago at pagtapos magpalit ng taon.
Kamakailan, nanalo ang isang mananaya ng higit P18 milyong jackpot prize ng Super Lotto 6/49 nitong Enero 2 na tumaya naman sa Sta. Barbara, lungsod ng Iloilo.
Mega winner din ang mananaya na mag-isang napanalunan ang higit P57 milyong jackpot prize ng Mega Lotto 6/45 nitong Enero 1 ng Barangay Santol, lungsod ng Quezon.
Paghahatian naman ng dalawang maswerteng mananaya ang jackpot prize na higit P25 milyong papremyo ng Lotto 6/42 nitong ika-31 ng Disyembre, 2024, na tumaya naman sa Naga City, Camarines Sur at Lucena City, Quezon.
Tumaya naman sa Legaspi, Albay ang isang mananaya na napanalunan naman ang higit P202 milyon nitong ika-29 ng Disyembre, 2024.
Bago naman sumapit ang pasko, napanalunan ng isang mananaya ng higit P15 milyong jackpot prize nitong ika-24 ng Disyembre, 2024 mula Molino 4, Bacoor City, Cavite.
Author
About the Author
