Photo courtesy |
Repetek News
ISINUSULONG ni City Councilor Luis Marcaida lll ang isang panukalang ordinansa na naglalayong magbigay ng insentibo sa lahat ng purok president sa lungsod ng Puerto Princesa.
Sa panukala, nakasaad ang pagbibigay ng isanlibong pisong (P1,000) cash incentives kada buwan sa mga presidente ng purok.
Sa panayam kay Marcaida, ito ay hindi ‘sahod’, sa halip isang allowance para sa nabanggit na indibidwal bilang pagbibigay halaga sa kanilang mga gampanin para mapabuti ang kanilang mga nasasakupan.
Aniya pa, ang mga purok president ay madalas gumagawa ng mga tungkulin ng walang sapat na benepisyo.
“Dati akong Kapitan ng Barangay Bancao- Bancao kaya alam ko ‘yung damdamin ng mga purok president na medyo talagang kapag may mga piyesta ‘yan bumubunot ng sariling pera ‘yan.
Pupunta sa mga opisyales ng barangay, sa mga opisyales ng city ‘pag may mga activities sila, wala silang mga pamasahe so alam ko po ang hirap ng mga purok president kaya ito ang nagtulak sa akin,” pahayag nito sa lokal midya.
Ang SDO No. 154-2025 na may titulong “An ordinance granting a monthly cash incentive of one thousand pesos (P1,000) to all Purok Presidents in the city of Puerto Princesa and appropriating funds thereof” ay nasa unang pagbasa pa lamang at ini-refer sa komite ng appropriations para pag-usapan.
Umaasa naman ang may akda na ito ay papaboran ng kaniyang mga kasamahang Konsehal, ng City Budget Office, at ni Punong Lungsod Lucilo Bayron.
“Kaka-introduce pa lang ngayong sesyon, so iri-refer pa sa komite ‘yan at magkakaroon pa ng deliberation.
Medyo uphill battle pa ito dahil siyempre ‘yung budget, yung appropriation. So, hopefully ay ma-approved po ito,” ayon pa sa Kagawad.
About the Author
