LIBRENG seminar at konsultasyong legal ang hatid ng mga abogado’t kawani ng Provincial Legal Extension Services Program (PLESP) ng Provincial Legal Office (PLO) ng kapitolyo sa bayan ng Linapacan noong Mayo 28 hanggang ika-29, taong kasalukuyan.
Ayon sa ulat mula sa Provincial Information Office, ang unang araw ng oryentasyon ay iginawad sa mga Punong Barangay, Barangay Kagawad, mga opisyal, at mga kasapi ng Lupong Tagapamayapa kung saan dumalo rito ang kabuuang walumpu’t anim (86)mula sa sampung (10) mga barangay ng nasabing bayan.
Kabuuang 67 na mga kliyente naman ang nabigyan ng libreng konsultasyong legal kasama na rito ang nagawan ng mga legal documents sa ikalawang araw ng aktibidad.
Samantala, tinalakay sa dalawang araw ng aktibidad ang mga paksang Katarungang Pambarangay (KP), mga tungkulin ng Barangay Officials, Code of Conduct and Ethical Standards for Public Officials and Employees, Safe Spaces Act, Anti-Trafficking in Person Act, at Republic Act (RA) 11596 o ang batas laban sa Child Marriage.
Pinangunahan ni PLESP Focal Person Atty. Mary Joy Ordaneza-Cascara ang aktibidad kasama ang mga abogado ng Tanggapan ng Provincial Legal na sina Atty. Christine N. Aribon, Atty. Azel Faith G. Fajarito, at Atty. Precious Joy D. Pacionela ng Office of the Governor na nagrepresenta ng Integrated Bar of the Philippines Palawan Chapter.
Nakibahagi naman sina MLGOO Il Eden Cayao ng DILG-Linapacan at Jayson Padin ng Department of Migrant Workers para sa usapin patungkol sa “Katarungang Pambarangay” at Trafficking in Persons.
Ayon pa sa Tanggapan ng Provincial Information, ang bayan ng Linapacan ang ika-labinsiyam na munisipyo na nabigyan ng mga serbisyong legal. Nilalayon ng PLESP na maihatid nang personal ang mga serbisyong legal sa lahat ng munisipyo sa lalawigan ng Palawan.
Author
About the Author
