Hinihinalang tulak ng droga, timbog sa buy-bust op

Timbog ng mga kawani ng Puerto Princesa City Police Office (PPCPO) Police Station 4 ang tatlong (3) mga kalalakihan na hinihinalang tulak umano ng droga nitong gabi ng Miyerkules, Hunyo 4, taong kasalukuyan.

Bumagsak sa mga kamay ng awtoridad ang mga suspek sa ikinasang buy-bust operation sa Bgy. Macarascas sa nabanggit na lungsod.

Kinilala ang mga suspek na sina alyas na “Ernesto”, 23-taong gulang, alyas “Jomar”, 19-taong gulang, at alyas “Junrey”, 18-taong gulang, pawang mga residente ng nabanggit na lugar.

Ayon sa detalye mula sa mga kapulisan, nabili umano sa mga suspek ang isang sachet ng crystalline substance na pinaniniwalaang “shabu” na nagkakahalaga ng isanlibong piso (P1,000.00).

Dagdag dito, nakumpiska rin sa mga suspek ang anim (6) pang mga pakete na naglalaman din ng ipinagbabawal na gamot.

Kasalukuyan namang nasa kostudiya ng pulisya ang tatlong mga suspek na nakatakdang sampahan ng kasong paglabag sa Republic Act 9165 o Comprehensive Dangerous Drugs Act of 2002.

Samantala, mahigpit na ipinababatid sa publiko na iwasan ang iligal na droga dahil sa masamang epekto nito sa tao at kalusugan.

About the Author

Pong Idusora

View All Posts