Kuhang larawan mula kay Mary Rose Pangadlo
Patuloy ang pag-angat ng produksyon ng iba’t ibang yamang-dagat sa lalawigan sa kabila ng mga hampon sa pangisdaan.
Sa datos ng Philippine Statistics Authority (PSA) nitong ika-28 ng Mayo, taong kasalukuyan, nakapagtala ang Palawan ng 5.7 porsyentong bahagyang pagtaas sa produksyyon ng mga yamang-dagat noong taong 2024 kumpara sa taong 2023.
Umabot sa 409,683.17 metric tons ang kabuuang produksyon ng mga yamang dagat sa lalawigan, mas mataas kumpara sa 387,000 metric tons na naitala noong 2023.
Batay sa impormasyon ng Fisheries Production Report para sa rehiyong MIMAROPA, umabot sa 91.6 porsyento ang naging kontribusyon ng Palawan sa produksyon ng yamang-dagat sa rehiyon at nasa 10.1 porsyento naman ang naibigay na produksyon ng lalawigan para sa buong bansa.
Ayon sa tanggapan ng impormasyon ng kapitolyo, resulta ng mas pinaigting na mga programa ng Pamahalaang Panlalawigan ang pagtaas ng produksyon na kung saan natulungan din ang kabuhayan ng mga mangingisda at tinitiyak ang sapat na suplay ng pagkain sa lalawigan.
Ilan sa mga pangunahing marine resources na naitalang may mataas na produksyon sa Palawan ang lato, at iba pang seaweeds, galunggong, alumahan, gulyasan, sapsap, talakitok, tulingan, posit, dalagang-bukid, matangbaka, alimasag at bisugo.
Itinuturing ng Pamahalaang Panlalawigan na patuloy na umuusad ang sektor ng pangisdaan dahil sa pinahusay na estratehiya para sa food security at economic stability ng mga mamamayan.
Author
About the Author
