SELOS. Iyan ang nakitang pangunahing motibo ng krimen nang bawian ng buhay ang 27-anyos na laborer matapos pagsasaksakin sa isang boarding house sa Chico Street sa Barangay Poblacion nitong madaling araw ng Biyernes, Hunyo 27, batay sa isinagawang imbestigasyon ng mga tauhan ng Narra Municipal Police Station.
Nahuli umano ng suspek na si alyas “Mark,” 34-anyos, negosyante, at residente ng Barangay Estrella sa kaparehong bayan ang kaniyang asawang naninirahan sa nasabing paupahang bahay na nakikipagtalik sa biktimang si alyas “Marvs,” residente ng Barangay Taritien sa bayan ng Narra, Palawan.
Sa tindi umano ng galit ng suspek, kinuha nito ang tinatayang 11-pulgadang patalim at inundayan ng saksak ang biktima.
Nagtamo ng saksak sa kaliwang bahagi ng likod ang biktimang si Alyas “Marvs” na naging dahilan para bawian ng buhay ito.
Narekober naman ng pulisya ang ginamit na kutsilyo sa pinangyarihan ng krimen. Nasa kustodiya na rin ng pulisya ang suspek na mahaharap sa kasong murder.
Samantala, ayon sa babaeng kalaguyo ng biktima, matagal na umano silang hiwalay ni “Mark”, ang itinuturong suspek na pumatay sa biktima.
Author
About the Author
