Photo courtesy: PPCPO
Ni Rodolfo Idusora
Sinuspinde ang klase sa Puerto Princesa City National Science High School nitong araw ng Huwebes, Hulyo 9, matapos umanong makatanggap ng shooting threat ang paaralan noong nakalipas na Miyerkules.
Batay sa paunang impormasyon, agad na ipinaalam sa mga kinauukulan ang banta upang masiguro ang kaligtasan ng mga mag-aaral, guro, at iba pang kawani ng paaralan. Bilang pag-iingat, nagpasya ang pamunuan ng paaralan na suspendihin ang mga klase habang isinasagawa ang kaukulang imbestigasyon.
Ayon sa abiso, nanatiling walang pasok ang mga estudyante hanggang nitong araw ng Biyernes, Hulyo 10. Nakatakdang magbalik ang regular na klase sa Lunes, kung wala nang magiging aberya at matapos matiyak ng mga awtoridad na ligtas na ang sitwasyon sa loob at paligid ng paaralan.
Patuloy ang imbestigasyon ng Puerto Princesa City Police Office upang matukoy ang pinagmulan ng naturang shooting threat. Sinusuri ng mga awtoridad ang lahat ng posibleng ebidensya at impormasyon upang malaman kung sino ang nasa likod ng insidente at kung may aktuwal na banta sa seguridad ng paaralan.
Hindi pa naglalabas ng karagdagang detalye ang pulisya habang nagpapatuloy ang kanilang imbestigasyon. Hiniling din sa publiko na iwasan ang pagpapakalat ng hindi kumpirmadong impormasyon upang hindi makadagdag sa pag-aalala ng mga magulang, mag-aaral, at mga guro.
Tiniyak ng mga awtoridad na patuloy silang nakikipag-ugnayan sa pamunuan ng paaralan upang mapanatili ang kaayusan at seguridad sa campus. Inaasahan ding magpapatupad ng karagdagang hakbang sa seguridad bago muling buksan ang klase.
Pinapayuhan ang mga magulang at mag-aaral na bantayan lamang ang mga opisyal na anunsyo ng paaralan at ng mga kinauukulang ahensya para sa mga susunod na abiso kaugnay ng insidente at sa iskedyul ng pagbabalik ng klase. Habang wala pang pinal na resulta ng imbestigasyon, nananatiling prayoridad ng mga awtoridad ang kaligtasan ng buong komunidad ng paaralan.
Author
About the Author
