City Jail, hinalughog

Ni Rodolfo Idusora

Nagsagawa ng search and seizure operation ang Philippine Drug Enforcement Agency (PDEA) Palawan Provincial Office kasama ang PDEA K9 Unit sa Puerto Princesa City Jail sa Barangay Sta. Monica nitong nakalipas na Agosto 21.

Pinangunahan ang operasyon sa ilalim ng pangangasiwa ni IA V Noreen P. Bautista, Provincial Officer ng PDEA Palawan.

Layunin ng operasyon na masuri ang loob ng correctional facility at maiwasan ang pagpasok, pagtatago, pagmamay-ari at pagkalat ng ilegal na droga at iba pang ipinagbabawal na gamit sa loob ng kulungan.

Kasama sa operasyon ang PDEA K9 Unit na tumulong sa paghahanap sa mga posibleng lugar kung saan maaaring itago ang mga kontrabando o ipinagbabawal na substansiya.

Ayon sa PDEA, bahagi ang naturang operasyon ng patuloy na kampanya ng ahensya laban sa ilegal na droga, lalo na sa mga lugar na kailangang mapanatili ang mahigpit na seguridad.

Mahalaga rin ang koordinasyon ng mga ahensya ng pamahalaan upang mapigilan ang pagpasok ng ilegal na droga sa mga correctional facility.

Patuloy naman ang PDEA Palawan sa pagsasagawa ng mga operasyon at iba pang hakbang upang mapalakas ang drug interdiction at seguridad sa mga kulungan.

Layunin nitong mapanatili ang isang ligtas at drug-free na correctional environment sa Puerto Princesa City Jail.

Samantala, patuloy ding hinihikayat ng mga awtoridad ang publiko na makipagtulungan sa mga law enforcement agency sa pamamagitan ng pagbibigay ng impormasyon tungkol sa ilegal na droga at iba pang ipinagbabawal na gawain.