Sumuko na si Kapitan

Ni Rodolfo Idusora

Sumuko na sa mga awtoridad ang kapitan ng MV June Aster na nasunog habang bumibiyahe patungong Coron, Palawan, limang araw matapos ang insidente.

Kinilala ng Philippine Coast Guard (PCG) ang kapitan bilang si Captain Roel Sarmiento, na kusang nagpakita sa tanggapan ng Atienza Interisland Ferries Inc. sa Palawan.

Ayon kay PCG Spokesperson Commodore Noemi Cayabyab, personal na humarap si Sarmiento sa mga kinauukulan matapos ang ilang araw na hindi ito nakikita sa mga operasyon at imbestigasyon kaugnay ng insidente.

Ang MV June Aster ay nasunog noong Setyembre 9 habang nasa karagatan ng Coron. Nagdulot ang insidente ng pagkamatay, pagkasugat, at pagkawala ng ilang pasahero at crew.

Patuloy pa rin ang recovery at search operations ng mga awtoridad sa barko at sa paligid ng lugar kung saan nangyari ang insidente.

Samantala, sinabi ng PCG na mahalaga ang pahayag ng kapitan sa pagbuo ng kabuuang larawan ng nangyari bago at habang sumiklab ang sunog.

Nauna nang sinabi ng PCG na hinihintay ang panig ni Sarmiento upang makatulong sa pagtukoy sa mga pangyayari na humantong sa insidente.

Kasunod ng kanyang pagsuko, inaasahang sasailalim si Sarmiento sa mga proseso ng imbestigasyon ng mga awtoridad.

Patuloy namang kinokolekta ng PCG at iba pang ahensiya ang mga ebidensya, testimonya at iba pang impormasyon na may kaugnayan sa trahedya.

Limang araw matapos ang insidente, muling nakaharap ng mga awtoridad ang kapitan ng MV June Aster habang nagpapatuloy ang imbestigasyon sa nangyari sa barko.

Inaasahang makatutulong ang kanyang salaysay sa pagtukoy sa sanhi ng sunog at sa iba pang detalye ng insidente.