Most Wanted sa 4B, nasakote sa Rizal
Editor’s Note: “Blurred” ang larawan ng biktima o suspek alinsunod sa probisyon ng Data Privacy Act. Photo Courtesy:
Repetek News
Ni Samuel Macmac
Naaresto ang Region’s Top 6 Most Wanted Person sa Brgy. Iraan, Rizal matapos ang matagumpay na operasyon na isinagawa ng mga awtoridad.
Ayon sa Palawan Provincial Police Office (PalPPO) kinilala ang suspek sa alyas na “Cinte”, 68-anyos, magsasaka, at residennte ng naturang barangay. Nahuli siya sa bisa ng warrant of arrest na inilabas ni Judge Ramon Chito R. Mendoza ng Regional Trial Court (RTC), Branch 165, Brooke’s Point, Palawan noong Abril 8, 2025.
Batay sa rekord, nahaharap ang suspek sa kasong statutory rape sa ilalim ng Article 266-A ng Revised Penal Code na inamiyendahan ng Republic Act No. 11648. Wala naman inirekomenda ang korte na piyansa para sa pansamantalang kalayaan ng akusado.
Pinangunahan ng Rizal Municipal Police Station (MPS) sa pamumuno ni PMAJ Bronson C. Caramto ang operasyon, katuwang ang Regional Intelligence Unit (PIU-4B)-Police Intelligence Team Palawan, Provincial Intelligence Unit, 1st Provincial Mobile Force Company, at Rizal Maritime Law Enforcement Team.
Matapos ang pagkakaaresto, dinala ang suspek sa Rizal MPS para sa dokumentasyon at kaukulang disposisyon. Samantala, binigyang-diin naman ni PalPPO Provincial Director PCOL Joel D. Casupanan na bahagi ng tuloy-tuloy na kampanya ng kapulisan laban sa mga wanted persons ang pagkakaaresto kay alyas “Cinte”.
