Photo courtesy | PPCPO
HIMAS-REHAS ngayon ang mga suspek sa pagnanakaw ng mga kable ng kuryente mula sa mga street lights sa Viet Ville ng Barangay Sta. Lourdes, madaling araw ng ika-29 ng Enero, taong kasalukuyan.
Batay sa police report, isang security guard ng Viet Ville ang nakapansin sa kakaibang ingay mula sa isang poste ng street lights sa harap ng establisyemento. Nang suriin niya ito, nakita niya ang tatlong indibidwal na humihila ng mga kable mula sa poste.
Dahil dito, agad itong ipinagbigay-alam ng guwardiya sa mga barangay tanod ng Sta. Lourdes na mabilis namang rumesponde.
Nang malapit ng matapos ang pagputol sa mga kable, kumaripas naman ng takbo ang mga suspek sa iba’t ibang direksyon nang mapansin nilang papalapit na ang mga tanod.
Naunang nadakip ang isa sa mga suspek na kinilalang si alyas “Win”, 30-taong gulang, mangingisda at residente ng Brgy. Sta. Lourdes ng lungsod na kung saan narekober sa kanya ang humigit-kumulang 12 metro ng mga kable ng kuryente na kulay pula, berde, at itim.
Nakatakas naman ang dalawa pa niyang kasamahan na sina alyas “Koko” at “Gibgib” subalit pinursige ng intel operatives mula sa Police Station 2 ang pagkakatimbog sa mga ito matapos magsagawa ng follow-up operation.
Kasalukuyang nasa kustodiya ng pulisya ang mga nahuling suspek para sa tamang disposisyon.
Ipinangako naman ni Police Colonel Cornelio C. Tadena Jr, City Director, na hindi palalampasin ang mga ganitong uri ng krimen sa lungsod ng Puerto Princesa at hinikayat ang mga residente na manatiling alerto at i-report ang anumang kahina-hinalang aktibidad sa kanilang lugar.
Author
About the Author
