Photo courtesy: DOST-PHIVOLCS
Ni Ferds Cuario
Patuloy na umabot sa pinakamataas na antas ng aktibidad hanggang ngayon ang pagsabog ng Bulkang Mayon matapos maging mas matindi ang Strombolian activity sa summit crater nito noong Lunes ng gabi.
Ayon sa Philippine Institute of Volcanology and Seismology (PHIVOLCS-DOST), ang patuloy na pagsabog ay nagpapalabas ng malalaking incandescent ballistic fragments o mainit na batong bumubuga pataas, habang patuloy na dumadaloy ang lava sa Mi-isi at Bonga Gullies.
Ang video na inilabas ng PHIVOLCS-DOST ay nakuha gamit ang kanilang camera sa iba’t ibang oras: alas-8:29 ng gabi, 9:30 ng gabi, 9:59 ng gabi, at 10:58 ng gabi, July 13. Sa Isa sa mga video, makikita rito ang malalakas na pagsabog, pag-apaw ng lava, at makapal na usok na sumasakop sa paligid ng bulkan.
Mahigpit na ipinagbabawal pa rin ang pagpasok sa 6-kilometer Permanent Danger Zone (PDZ). Nananatili ang Alert Level 3 sa Mayon Volcano, na nangangahulugang may posibilidad pa rin ng mapanganib na pagsabog sa susunod na mga araw.
“Eruptive activity at Mayon reaches its peak phase to date,” ani PHIVOLCS sa kanilang opisyal na pahayag. Pinapaalalahanan nila ang publiko na manatiling ligtas at sumunod sa mga babala ng mga lokal na awtoridad.
Sa kasalukuyan, hinihikayat ang mga residente sa paligid ng bulkan na maging handa at sundin ang mga evacuation at safety protocols na ipinatutupad ng Provincial Disaster Risk Reduction and Management Office (PDRRMO) ng Albay.
Ang Bulkang Mayon ay isa sa pinakaaktibo at magandang bulkan sa Pilipinas. Sa ilalim ng Alert Level 3, patuloy na binabantayan ng PHIVOLCS ang sitwasyon para sa karagdagang pagtaas o pagbaba ng alert level.
Author
About the Author
