Viral na pananakit ng estudyante, ‘under investigation’
Photo Courtesy: PIO Palawan
Ni Ferds Cuario
Iniimbestigahan ngayon ng Police Station 1 ng Puerto Princesa City Police Office (PPCPO) ang insidente ng umano’y pananakit sa dalawang kabataang estudyante sa H. Mendoza Street, malapit sa isang establisyimento, dakong alas-12:30 ng tanghali nitong Agosto 17, 2026.
Ayon sa opisyal na pahayag ng Police Station 1, agad na nagtungo sa himpilan ang dalawang biktima matapos ang insidente at inasistehan ng Women and Children Protection Desk (WCPD).
Patuloy ang imbestigasyon ng pulisya upang matukoy ang buong pangyayari at mga taong posibleng sangkot sa insidente.
Kabilang sa mga isinasagawang hakbang ang pagkuha at pagsusuri ng CCTV footage, pakikipag-ugnayan sa establisyimento na malapit sa pinangyarihan, at koordinasyon sa school principal o mga kinauukulang school authorities ng mga estudyante.
Nanawagan naman ang pulisya sa mga nakasaksi, nakapag-video, o may anumang impormasyong makatutulong sa imbestigasyon na agad makipag-ugnayan sa Police Station 1.
Kasabay nito, mariing hiniling ng mga awtoridad na huwag ipakalat o i-post sa social media ang anumang video o larawan ng insidente, lalo na’t mga menor de edad ang sangkot.
Ayon sa pulisya, mahalagang maprotektahan ang privacy ng mga kabataan at maiwasang makompromiso ang isinasagawang imbestigasyon.
Hinikayat din ang publiko na maging mapagmatyag at agad humingi ng police assistance kapag nakasaksi ng pananakit o anumang insidenteng nangangailangan ng agarang aksyon.
Maaaring makipag-ugnayan sa Police Station 1 sa 0998-598-5906 o tumawag sa 911 para sa emergency.
