News update: sasakyan ni Maristela nabagsakan ng punongkahoy

Ni Rodolfo Idusora

Malaking pinsala ang tinamo ng isang Elf truck na pag-aari umano ng Tanggapan ni City Vice Mayor Peter “Jimbo” Maristela matapos itong mabagsakan ng malaking punongkahoy sa Barangay Napsan, Puerto Princesa City, noong Setyembre 10.

Ayon sa impormasyong ibinahagi ng uploader na si Melanie Bantog, ilang minuto pa lamang na nakaparada ang sasakyan sa lugar nang biglang bumagsak dito ang malaking puno.

Dahil sa lakas ng pagkakabagsak, malaking bahagi ng L300 ang napinsala. Makikita sa mga kuhang larawan ang lawak ng pinsalang tinamo ng sasakyan matapos matamaan ng puno.

Sa kabila ng insidente, wala namang naitalang nasaktan. Kapansin-pansin din na wala umanong malakas na ulan o hangin nang mangyari ang insidente.

Ayon kay Bantog, bigla na lamang natumba ang malaking puno at bumagsak sa nakaparadang sasakyan.

Hindi naman agad malinaw kung ano ang dahilan ng pagbagsak ng puno. Maaari itong may kaugnayan sa kondisyon o pagkabunot ng mga ugat nito, ngunit kailangan pa rin ng kaukulang pagsusuri upang matukoy ang eksaktong sanhi.

Patuloy namang inaasahan ang paglilinis sa lugar at pagtatanggal ng bumagsak na puno upang maiwasan ang karagdagang panganib sa mga motorista at residente.

Nagsisilbi rin itong paalala sa mga may-ari ng sasakyan at mga residente na maging maingat sa pagparada malapit sa malalaki at matatandang puno, lalo na kung may nakikitang senyales ng pagkabulok o panghihina ng mga ito.

Wala namang naiulat na iba pang nasirang ari-arian o nasaktan sa naturang insidente.