Brice Baisa kampeon sa USTA Naperville 18U
Photo Courtesy: Anthony Baisa
Ni Ferds Cuario
Nasungkit ni Brice Vincent Baisa (BVB) ang kampeonato sa USTA (United States Tennis Association) 18 & Under Singles Championship matapos ang matinding three-set comeback victory sa finals na ginanap sa Naperville, Illinois, United States.
Nagpakita ng tibay ng loob si Baisa sa buong torneo, lalo na sa quarterfinals kung saan nabawi niya ang 2-4 na pagkakaiwan sa unang set. Mula rito ay nagtala siya ng apat na sunod na laro upang angkinin ang unang set, 6-4, bago tuluyang dominahin ang ikalawang set, 6-2, para umabante sa semifinals.
Sa semifinal match, hindi na pinatagal ni Baisa ang laban matapos manaig sa straight sets, 6-2 at 6-3, upang makapasok sa championship match.
Sa finals, umabot ng mahigit dalawang oras ang bakbakan. Matapos maitabla ang unang set sa 6-6, natalo si Baisa sa tiebreak, 6(3)-7.
Hindi rin naging madali ang ikalawang set nang maagap na umabante ang kanyang kalaban, 2-0. Naitabla niya ang laban sa pamamagitan ng 6-2 panalo sa ikalawang set.
Sa deciding 10-point super tiebreak, ipinakita ni Baisa ang kanyang composure at mental toughness upang manaig, 10-6, at tuluyang masungkit ang kampeonato.
Matapos ang tagumpay sa Naperville USA, nakatakdang sumabak si Baisa sa isa pang torneo sa Wisconsin sa susunod na linggo, kung saan target niyang makabawi matapos magtapos bilang runner-up sa naturang kompetisyon dalawang linggo na ang nakalipas.
