BRICE BAISA, RUNNER-UP SA TENNIS TOURNAMENT SA AMERIKA
Photo courtesy : Anthony Baisa FB page
Ni FFerds Cuario
Nagpakitang-gilas ang Palaweñong tennis player na si Brice Vincent Baisa matapos magtala ng runner-up finish sa USTA Boys 18s Tournament na ginanap mula Hulyo 11 hanggang 13.
Sa knockout stage, ipinamalas ni Baisa ang matatag na laro nang kanyang talunin ang No. 4 seed sa quarterfinals sa iskor na 6-4, 5-7, 10-0.
Sinundan niya ito ng isa pang malaking panalo sa semifinals kung saan kanyang pinabagsak ang No. 2 seed sa makipot na laban na 3-6, 6-1, 10-6, upang makausad sa championship match.
Sa final laban, hinarap ni Baisa ang top seed ng tournament. Bagaman natalo siya, dikit ang laban sa score na 4-6, 6-7.
Ang magandang performance ni Baisa sa prestihiyosong USTA circuit ay itinuturing na malaking hakbang sa kanyang pag-unlad bilang junior tennis player. Ang kanyang mga tagumpay laban sa mataas na ranggo na kalaban ay nagpapakita ng kanyang kakayahang makipagsabayan sa pinakamahuhusay na young players sa Estados Unidos.
Patuloy na nagbibigay ng karangalan si Baisa sa Palawan at sa buong Pilipinas sa kanyang pag-angat sa international tennis scene.
