Feeding program at tulong pinansyal sa Langogan

Ni Rodolfo Idusora

Muling nagsagawa ng feeding program si City Vice Mayor Peter “Jimbo” Maristela para sa mga batang nag-aaral sa Sunflower Day Care Center sa Sitios Bolo-Bolo at Macandring, Barangay Langogan, sa Lungsod ng Puerto Princesa, nitong Huwebes, Agosto 20.

Layunin ng programa na makatulong sa pangangailangan ng mga batang day care student, lalo na sa kanilang pagkain habang sila ay pumapasok sa paaralan.

Bukod sa pagkain, namahagi rin si Maristela ng gatas para sa mga bata. Bahagi ito ng kanyang pagtulong upang magkaroon ng dagdag na pagkain ang mga mag-aaral.

Nagbigay rin ang Bise Alkalde ng tulong pinansiyal na gagamitin sa pagbili ng electric fan para sa Sunflower Day Care Center.

Ayon sa programa, makatutulong ang electric fan upang maging mas maayos at komportable ang lugar kung saan nag-aaral ang mga bata, lalo na sa mainit na panahon.

Nagpasalamat naman si Jane Fabrigas, Child Development Worker ng Sunflower Day Care Center, sa pagbisita at pagtulong ni Maristela.

Nagpaabot din ng pasasalamat ang mga magulang ng mga batang mag-aaral dahil sa oras at tulong na inilaan ng Bise Alkalde para sa kanilang mga anak.

Patuloy naman ang panawagan sa mga ahensya ng pamahalaan, pribadong grupo at iba pang organisasyon na suportahan ang mga programa para sa mga bata, partikular ang mga nasa malalayong komunidad.

Para sa mga magulang at child development workers sa Barangay Langogan, malaking tulong ang mga ganitong programa dahil direktang napapakinabangan ng mga bata ang pagkain, gatas at mga kagamitang makatutulong sa kanilang pag-aaral.

Sa pamamagitan ng feeding program at iba pang suporta, nais makatulong ni Vice Mayor Maristela sa pang-araw-araw na pangangailangan ng mga batang nag-aaral sa mga day care center sa lungsod.