San Vicente at El Nido, kasama sa makatatanggap ng libreng internet

Ni Albert Villamor Jr.

Kabilang ang Palawan sa makatatanggap ng libreng WIFI (Wireless Fidelity) o internet connection para sa mga dinarayong lugar panturismo.

Ito ay sa ilalim ng proyektong WiFi Internet Access in Tourists Spots (WITS) na nagkakahalaga ng ng ₱ 112.43 Milyon, na proyekto ng pamahalaan sa pamamagitan ng Department of Information and Communications Technology (DICT).

Ang napiling mga lugar sa Palawan ay mga tinaguriang “tourism hotbeds” o mga dinarayo ng mga turista: El Nido Beach sa El Nido, at White Beach sa San Vicente.

Kabuuang 25 tourist destinations sa Palawan ang damay sa proyekto, ayon sa Information & Communication Section of San Vicente, Palawan.

Noong Setyembre 2 sa munisipyo ng San Vicente, nagtungo na ang ilang kawani ng DICT sa opisina ni San Vicente Mayor Ramir Rodriguez Pablico para sa proyekto.

Kabilang sa mga kawani ng DICT MIMAROPA na bumisita kay Mayor Pablico ay sina Engr. Virgo Pinangay, Provincial Head; Recardo Arzaga, Information System Analyst II; Joely Bev Ordiz, Project Development Officer II; at si Mr. Keith Andrew Asuero, Project Development Officer I.