KALSADA MULA JACANA HANGGANG LIBERTY, MAAYOS NA
Photo courtesy: CIO Puerto Princesa
Ni Ferds Cuario
Pormal nang pinasinayaan ni Puerto Princesa City Mayor Lucilo R. Bayron ang bagong konkretong kalsada mula Jacana Road hanggang Liberty-Puloy noong Hulyo 7.
Nagkakahalaga ng ₱61,259,492.76 ang proyekto. Saklaw nito ang bahagi ng kalsada mula Barangay Bancao-Bancao hanggang Barangay Bagong Sikat.
Ayon sa pamahalaang panlungsod, layunin ng proyekto na mapabilis at mapagaan ang biyahe ng mga motorista at residente na araw-araw na dumaraan sa naturang ruta.
Matatandaan, bukod sa naturang kalsada, pinasinayaan din kamakailan ang iba pang proyektong pang-imprastraktura at serbisyong pampubliko sa lungsod. Kabilang dito ang bagong 3-storey, siyam na silid-aralan na gusali na may solar panels sa Valentin Macasaet Memorial Elementary School, ang bagong Mini City Hall sa Barangay Macarascas, ang bagong Digital X-Ray machine at laboratory equipment sa Macarascas Enhanced Satellite Clinic, at ang bagong City Engineering and Architecture Building.
